“ಇದು ನಮ್ಮದು ಅಲ್ಲ”: ಖಾತೆಗೆ ತಪ್ಪಾಗಿ ಬಂದ ₹10 ಕೋಟಿ ಮರಳಿಸಲು ಮಹಿಳೆಯ ಮನವಿ ಪ್ರಾಮಾಣಿಕತೆಗೆ ಜನರ ಶಭಾಷ್

ಲಕ್ನೋ, ಮಾ.28: ಅಚಾನಕ್ ಆಗಿ ಖಾತೆಗೆ ಕೋಟಿ ಕೋಟಿ ಹಣ ಬಂದರೆ ಬಹುತೇಕರು ಖುಷಿಯಿಂದ ಕಂಗೊಳಿಸುತ್ತಾರೆ. ಆದರೆ ಉತ್ತರ ಪ್ರದೇಶದ ಮೈನ್ಪುರಿಯಲ್ಲಿ ಮಹಿಳೆಯೊಬ್ಬಳು ಅದೇ ಪರಿಸ್ಥಿತಿಯಲ್ಲಿ ತೋರಿದ ಪ್ರಾಮಾಣಿಕತೆ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ. ತಾಂತ್ರಿಕ ದೋಷದಿಂದ ತನ್ನ ಖಾತೆಗೆ ಜಮೆಯಾದ ಸುಮಾರು ₹10 ಕೋಟಿ ಹಣವನ್ನು ಮರಳಿ ಪಡೆಯುವಂತೆ ಬ್ಯಾಂಕ್ಗೆ ಮನವಿ ಮಾಡಿದ ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಉತ್ತರ ಪ್ರದೇಶ ರಾಜ್ಯದ ಮೈನ್ಪುರಿ ಜಿಲ್ಲೆಯ ಬಿಚ್ವಾನ್ ಪ್ರದೇಶದ ದೇವ್ಗಂಜ್ ಗ್ರಾಮದ ನಿವಾಸಿ ರೀಟಾ, ರೈತ ಪರಸ್ಭಾನ್ ಬಹೇಲಿಯಾ ಅವರ ಪತ್ನಿ. ನವರಾತ್ರಿಯ ಸಂದರ್ಭದಲ್ಲಿ ಬ್ಯಾಂಕ್ನಿಂದ ಹಣ ತೆಗೆಯಲು ಹೋಗಿದ್ದಾಗ, ಶಾಖೆ ಮುಚ್ಚಿದ್ದ ಕಾರಣ ಹತ್ತಿರದ ಎಟಿಎಂನಲ್ಲಿ ಬ್ಯಾಲೆನ್ಸ್ ಪರಿಶೀಲಿಸಿದ್ದಾರೆ.

ಆ ವೇಳೆ, ಅವರ ಖಾತೆಯಲ್ಲಿ ₹9,99,49,588 ರೂಪಾಯಿ ಇರುವುದಾಗಿ ಎಟಿಎಂ ತೋರಿಸಿದೆ. ಈ ಅಸಾಧಾರಣ ಮೊತ್ತವನ್ನು ನೋಡಿ ದಂಪತಿ ಕ್ಷಣಕ್ಕೇ ಬೆಚ್ಚಿಬಿದ್ದಿದ್ದಾರೆ. “ಇದು ಹೇಗೆ ಸಾಧ್ಯ?” ಎಂಬ ಅನುಮಾನದಿಂದ ಮತ್ತೊಂದು ಎಟಿಎಂನಲ್ಲಿ ಮರುಪರಿಶೀಲನೆ ಮಾಡಿದ್ದು, ಅಲ್ಲಿ ಕೂಡ ಅದೇ ಮೊತ್ತ ತೋರಿಸಿದೆ.

ಈ ವಿಚಿತ್ರ ಘಟನೆ ಬಗ್ಗೆ ಖಚಿತಪಡಿಸಿಕೊಳ್ಳಲು ದಂಪತಿ ತಮ್ಮ ಮೊಬೈಲ್ನಲ್ಲಿ ವಿಡಿಯೋ ದಾಖಲಿಸಿದ್ದಾರೆ. ನಂತರ ಆ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೆಯಾಗಿದ್ದು, ಕೆಲವೇ ಗಂಟೆಗಳಲ್ಲಿ ವೈರಲ್ ಆಗಿದೆ. “ಒಂದು ಕ್ಷಣದ ಲಾಟರಿ”ಯಂತೆ ಕಾಣಿಸಿದ ಈ ಘಟನೆ, ನಂತರ ಪ್ರಾಮಾಣಿಕತೆಯ ಕಥೆಯಾಗಿ ರೂಪಾಂತರಗೊಂಡಿದೆ.

ತನ್ನದಲ್ಲದ  ಹಣಕ್ಕೆ ಕೈ ಹಾಕದ ಪ್ರಾಮಾಣಿಕತೆ ಮೆರೆದ ಮಹಿಳೆ

ಖಾತೆಯಲ್ಲಿ ಕೋಟಿ ಕೋಟಿ ಹಣ ಕಾಣಿಸಿಕೊಂಡರೂ, ರೀಟಾ ಯಾವುದೇ ಹಣವನ್ನು ತೆಗೆಯಲಿಲ್ಲ. ಅಲ್ಲದೆ, ಕುಟುಂಬ ಸದಸ್ಯರಿಗೂ “ಈ ಹಣ ನಮ್ಮದು ಅಲ್ಲ, ಯಾರೂ ಇದಕ್ಕೆ ಕೈ ಹಾಕಬಾರದು” ಎಂದು ಕಟ್ಟುನಿಟ್ಟಾಗಿ ಸೂಚಿಸಿದ್ದಾರೆ. ನಂತರ ಅವರು ಸ್ವತಃ ಬ್ಯಾಂಕ್ ಅಧಿಕಾರಿಗಳನ್ನು ಸಂಪರ್ಕಿಸಿ, ತಪ್ಪಾಗಿ ಜಮೆಯಾದ ಹಣವನ್ನು ಹಿಂದಕ್ಕೆ ಪಡೆಯುವಂತೆ ಮನವಿ ಮಾಡಿದ್ದಾರೆ.

ಈ ನಡೆ ಗ್ರಾಮದಲ್ಲಿಯೂ, ಸಾಮಾಜಿಕ ಜಾಲತಾಣಗಳಲ್ಲಿಯೂ ಪ್ರಶಂಸೆಗೆ ಪಾತ್ರವಾಗಿದೆ. “ಪ್ರಾಮಾಣಿಕತೆ ಇನ್ನೂ ಜೀವಂತವಾಗಿದೆ” ಎಂದು ಹಲವರು ಕೊಂಡಾಡಿದ್ದಾರೆ.

ಬ್ಯಾಂಕ್ ಆಫ್ ಇಂಡಿಯಾ  ಕರೀಮ್ಗಂಜ್ ಶಾಖೆಯ ವ್ಯವಸ್ಥಾಪಕ ರಿಷಿಕಾಂತ್ ಪಾಂಡೆ ಮಾಹಿತಿ ನೀಡಿದಂತೆ, ಈ ಹಣ ತಾಂತ್ರಿಕ ದೋಷ ಅಥವಾ ವಹಿವಾಟಿನ ಸಮಯದಲ್ಲಿ ನಡೆದ ತಪ್ಪಿನಿಂದ ಖಾತೆಗೆ ಜಮೆಯಾಗಿರಬಹುದು. ಪ್ರಕರಣವನ್ನು ಪರಿಶೀಲಿಸಿ, ಸರಿಯಾದ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಿದ್ದಾರೆ.

ಬ್ಯಾಂಕ್ ತಜ್ಞರ ಪ್ರಕಾರ, ಖಾತೆಗೆ ತಪ್ಪಾಗಿ ಜಮೆಯಾದ ಹಣವನ್ನು ಬಳಸುವುದು ಕಾನೂನುಬಾಹಿರ. ಇಂತಹ ಸಂದರ್ಭಗಳಲ್ಲಿ ತಕ್ಷಣ ಬ್ಯಾಂಕ್ಗೆ ಮಾಹಿತಿ ನೀಡುವುದು ಸರಿಯಾದ ಕ್ರಮ. ರೀಟಾ ತೆಗೆದುಕೊಂಡ ನಿರ್ಧಾರ ಕೇವಲ ನೈತಿಕವಾಗಿ ಮಾತ್ರವಲ್ಲ, ಕಾನೂನುಬದ್ಧವಾಗಿಯೂ ಶ್ರೇಷ್ಠ ಉದಾಹರಣೆಯಾಗಿದೆ.

ಹಣದ ಲಾಲಸೆಯ ನಡುವೆ ಈ ಮಹಿಳೆ ಸಮಾಜಕ್ಕೆ ಮಾದರಿ ಇಂದಿನ ದಿನಗಳಲ್ಲಿ ಹಣದ ಲಾಲಸೆಯ ನಡುವೆ, ಈ ರೀತಿಯ ಪ್ರಾಮಾಣಿಕ ನಡೆ ವಿರಳವಾಗಿದೆ. ಗ್ರಾಮೀಣ ಹಿನ್ನೆಲೆಯಲ್ಲಿರುವ ಈ ಕುಟುಂಬದ ಸರಳತೆ ಮತ್ತು ಸತ್ಯನಿಷ್ಠೆ, ದೊಡ್ಡ ಸಂದೇಶವನ್ನೇ ಸಾರುತ್ತಿದೆ.

“ಹಣಕ್ಕಿಂತ ಮೌಲ್ಯ ದೊಡ್ಡದು” ಎಂಬುದನ್ನು ರೀಟಾ ತನ್ನ ನಡೆ ಮೂಲಕ ತೋರಿಸಿದ್ದು, ಸಮಾಜಕ್ಕೆ ಪ್ರೇರಣೆಯಾಗಿ ಪರಿಣಮಿಸಿದೆ.