ವರದಿ: ಎಂ. ನಾಗೇಂದ್ರಕುಮಾರ್
ಟಿ.ನರಸೀಪುರ, ಫೆ. 19: ಹಲವು ದಶಕಗಳಿಂದ ಕ್ರೀಡಾಪಟುಗಳು ಹಾಗೂ ಸಾರ್ವಜನಿಕರ ಬಹುಕಾಲದ ಬೇಡಿಕೆಯಾಗಿದ್ದ ಸುಸಜ್ಜಿತ ಕ್ರೀಡಾಂಗಣ ನಿರ್ಮಾಣಕ್ಕೆ ಮುಖ್ಯಮಂತ್ರಿ Siddaramaiah ಅನುದಾನ ಬಿಡುಗಡೆ ಮಾಡಿರುವುದು ಸ್ವಾಗತಾರ್ಹ ಬೆಳವಣಿಗೆಯಾಗಿದ್ದು, ಕೆಲ ಪರಿಸರ ಪ್ರೇಮಿಗಳು ಒಳ್ಳೆಯ ಕೆಲಸಕ್ಕೆ ಅಡ್ಡಿಪಡಿಸದೆ ಸಹಕಾರ ನೀಡಬೇಕು ಎಂದು ತಾಲ್ಲೂಕು ಪಂಚಾಯತಿ ಮಾಜಿ ಉಪಾಧ್ಯಕ್ಷ ಡಾ. ಬಿ. ಮರಯ್ಯ ಮನವಿ ಮಾಡಿದರು.
ಪಟ್ಟಣದ ಬೈರಾಪುರದಲ್ಲಿರುವ ದೇವಸ್ಥಾನದ ಆವರಣದಲ್ಲಿ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದ ಅವರು, “ಮುಖ್ಯಮಂತ್ರಿ ಸಿದ್ದರಾಮಯ್ಯರು, ಸಚಿವ ಮಹದೇವಪ್ಪರು, ಡಾ. ಯತೀಂದ್ರ ಸಿದ್ದರಾಮಯ್ಯರು ಹಾಗೂ ಶಾಸಕ ಸುನಿಲ್ ಬೋಸ್ ಅವರ ಇಚ್ಚಾಶಕ್ತಿಯಿಂದ ದಶಕಗಳ ಕೂಗಾಗಿದ್ದ ಕ್ರೀಡಾಂಗಣ ನಿರ್ಮಾಣಕ್ಕೆ ಕ್ರಮ ಕೈಗೊಳ್ಳಲಾಗಿದೆ. ತಹಶೀಲ್ದಾರ್ ಹಾಗೂ ಸರ್ವೇ ಇಲಾಖೆ ಸ್ಥಳ ಪರಿಶೀಲನೆ ನಡೆಸಿ, ಫ್ಯಾಕ್ಟರಿಗೆ ಎಷ್ಟು ಜಾಗ ಬಿಡಬೇಕು ಮತ್ತು ಕ್ರೀಡಾಂಗಣಕ್ಕೆ ಎಷ್ಟು ಸ್ಥಳ ಮೀಸಲಿಡಬೇಕು ಎಂಬುದನ್ನು ಗುರುತಿಸಿದೆ” ಎಂದು ತಿಳಿಸಿದರು.
ಇದನ್ನೂ ಓದಿ:- ಕೊಪ್ಪಳದಲ್ಲಿ ಮರ್ಯಾದಾ ಹತ್ಯೆ ಯತ್ನ: ಕೊಡಲಿ ಏಟಿನಿಂದ ಗಾಯಗೊಂಡ 4 ತಿಂಗಳ ಗರ್ಭಿಣಿ ಜೀವಾಪಾಯದಿಂದ ಪಾರು
ಟಿ.ನರಸೀಪುರ ಹಾಗೂ ವರುಣಾ ವಿಧಾನಸಭಾ ಕ್ಷೇತ್ರಗಳಲ್ಲಿ ಅನೇಕ ಪ್ರತಿಭಾನ್ವಿತ ಕ್ರೀಡಾಪಟುಗಳಿದ್ದು, ರಾಜ್ಯ, ರಾಷ್ಟ್ರ ಹಾಗೂ ಅಂತರರಾಷ್ಟ್ರೀಯ ಮಟ್ಟದ ಕ್ರೀಡಾಕೂಟಗಳಲ್ಲಿ ಭಾಗವಹಿಸಿ ಪ್ರಶಸ್ತಿ ಪಡೆದು ಕ್ಷೇತ್ರದ ಕೀರ್ತಿಯನ್ನು ಹೆಚ್ಚಿಸಿದ್ದಾರೆ. ಆದರೆ, ಸೂಕ್ತ ಮೂಲಸೌಕರ್ಯಗಳ ಕೊರತೆಯಿಂದಾಗಿ ಹಲವರು ತಮ್ಮ ಪ್ರತಿಭೆಯನ್ನು ಮಧ್ಯದಲ್ಲೇ ನಿಲ್ಲಿಸಬೇಕಾದ ಪರಿಸ್ಥಿತಿ ಎದುರಿಸುತ್ತಿದ್ದಾರೆ ಎಂದು ಅವರು ವಿಷಾದಿಸಿದರು.
“ಅಂತಹ ಸಂದರ್ಭದಲ್ಲಿ ಎಕರೆಗಟ್ಟಲೆ ವಿಶಾಲ ಪ್ರದೇಶವಿರುವ ಸಿಲ್ಕ್ ಫ್ಯಾಕ್ಟರಿ ಜಾಗವನ್ನು ಕ್ರೀಡಾಂಗಣ ನಿರ್ಮಾಣಕ್ಕೆ ಬಳಸುವುದು ಸೂಕ್ತ. ಇದಕ್ಕೆ ಕೆಲ ಪರಿಸರ ಪ್ರೇಮಿಗಳು ಅಡ್ಡಿಪಡಿಸುತ್ತಿರುವುದು ಸರಿಯಾದ ಕ್ರಮವಲ್ಲ. ಸಾರ್ವಜನಿಕ ಹಿತದೃಷ್ಟಿಯಿಂದ ಈ ಯೋಜನೆಯನ್ನು ನೋಡಬೇಕು” ಎಂದು ಅವರು ಆಕ್ರೋಶ ವ್ಯಕ್ತಪಡಿಸಿದರು.
ಡಾ. ಮರಯ್ಯ ಅವರು ಪರಿಸರ ಪ್ರಶ್ನೆಯ ಬಗ್ಗೆ ಸ್ಪಷ್ಟನೆ ನೀಡುತ್ತಾ, “ಮೈಸೂರಿನಲ್ಲಿ ಹಲವಾರು ಕಡೆ ಪರಿಸರ ಹಾನಿ ಉಂಟುಮಾಡಿ ನಿರ್ಮಿಸಲಾದ ಸರ್ಕಾರಿ ಕಟ್ಟಡಗಳು ಇವರ ಗಮನಕ್ಕೆ ಬಂದಿಲ್ಲವೇ? ಇಲ್ಲಿ ಮಾತ್ರ ವಿರೋಧಿಸುವುದು ಏಕೆ?” ಎಂದು ಪ್ರಶ್ನಿಸಿದರು. ಸಿಲ್ಕ್ ಫ್ಯಾಕ್ಟರಿಯಲ್ಲಿ ಕಳೆದ 20 ವರ್ಷಗಳಿಂದ ನಡೆಯುತ್ತಿರುವ ರೇಷ್ಮೆ ನೂಲು ಉತ್ಪಾದನೆಯಿಂದ ಹೊರಬರುವ ದುರ್ವಾಸನೆ, ರೇಷ್ಮೆ ಹುಳುಗಳ ತ್ಯಾಜ್ಯ ಹಾಗೂ ಕಲ್ಲಿದ್ದಲಿನ ಧೂಳು ಸ್ಥಳೀಯರ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರಿದೆ ಎಂದು ಆರೋಪಿಸಿದರು.
ಇದನ್ನೂ ಓದಿ:- ಪ್ರಕಾಶ್ ಬೆಳವಾಡಿ ಅವರಿಗೆ 2026ರ ಭೈರಪ್ಪ ಸಾಹಿತ್ಯ ಪ್ರತಿಷ್ಠಾನ ಗೌರವ
“ಬೈರಾಪುರ ನಾಲ್ಕನೇ ವಾರ್ಡಿನ ಮನೆಗಳಲ್ಲಿ ಪ್ರತಿದಿನ ಮೂರುರಿಂದ ನಾಲ್ಕು ಮಗ್ಗುಲು ಧೂಳು ಸೇರುತ್ತಿದೆ. ಇದರಿಂದ ಮಕ್ಕಳು ಹಾಗೂ ವೃದ್ಧರು ಉಸಿರಾಟ ಸಮಸ್ಯೆ ಸೇರಿದಂತೆ ಅನೇಕ ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದಾರೆ. ಪರಿಸರ ಉಳಿಸಬೇಕೆಂದು ಹೇಳುವವರು ನಮ್ಮ ಜನರ ಆರೋಗ್ಯದ ಬಗ್ಗೆ ಏನು ಕ್ರಮ ಕೈಗೊಳ್ಳುತ್ತಾರೆ?” ಎಂದು ಪ್ರಶ್ನಿಸಿದರು.
ಇನ್ನೂ ಕೆಲವು ನೌಕರರು ಪರಿಸರದ ಹೆಸರಿನಲ್ಲಿ ಪ್ರತಿಭಟನೆಗೆ ಪ್ರೇರೇಪಿಸುತ್ತಿರುವ ಆರೋಪ ಮಾಡಿರುವ ಅವರು, “ಇಂತಹವರನ್ನು ಸರ್ಕಾರ ಬೇರೆಡೆಗೆ ವರ್ಗಾವಣೆ ಮಾಡುವ ಕುರಿತು ಪರಿಗಣಿಸಬೇಕು” ಎಂದು ಆಗ್ರಹಿಸಿದರು.
ಕ್ರೀಡಾಭಿವೃದ್ಧಿಗೆ ದೊಡ್ಡ ಹೆಜ್ಜೆ
ಟಿ.ನರಸೀಪುರ ಮತ್ತು ವರುಣಾ ಕ್ಷೇತ್ರಗಳ ಯುವಕರಿಗೆ ಸಮರ್ಪಕ ಕ್ರೀಡಾಂಗಣದ ಕೊರತೆ ಹಲವು ವರ್ಷಗಳಿಂದ ಚರ್ಚೆಯ ವಿಷಯವಾಗಿತ್ತು. ಸ್ಥಳೀಯ ಶಾಲೆಗಳು ಹಾಗೂ ಕಾಲೇಜುಗಳ ಕ್ರೀಡಾಪಟುಗಳು ಅಭ್ಯಾಸಕ್ಕೆ ಸೂಕ್ತ ಮೈದಾನವಿಲ್ಲದೆ ರಸ್ತೆಯ ಬದಿಗಳು ಅಥವಾ ಖಾಲಿ ಜಾಗಗಳಲ್ಲಿ ತರಬೇತಿ ನಡೆಸುತ್ತಿರುವುದು ಸಾಮಾನ್ಯ ದೃಶ್ಯ. ರಾಜ್ಯ ಮಟ್ಟದ ಸ್ಪರ್ಧೆಗಳಲ್ಲಿ ಭಾಗವಹಿಸುವವರು ಕೂಡ ಮೂಲಭೂತ ಸೌಲಭ್ಯಗಳ ಕೊರತೆಯನ್ನು ಎದುರಿಸುತ್ತಿದ್ದಾರೆ.
“ಒಂದು ಸುಸಜ್ಜಿತ ಕ್ರೀಡಾಂಗಣ ನಿರ್ಮಾಣವಾದರೆ ಅಥ್ಲೆಟಿಕ್ಸ್, ಕ್ರಿಕೆಟ್, ಫುಟ್ಬಾಲ್, ವಾಲಿಬಾಲ್ ಸೇರಿದಂತೆ ವಿವಿಧ ಕ್ರೀಡೆಗಳಿಗೆ ಪ್ರೋತ್ಸಾಹ ದೊರೆಯುತ್ತದೆ. ಗ್ರಾಮೀಣ ಭಾಗದ ಪ್ರತಿಭೆಗಳು ಮೆಟ್ಟಿಲೇರಲು ಇದು ವೇದಿಕೆಯಾಗುತ್ತದೆ” ಎಂದು ಡಾ. ಮರಯ್ಯ ಹೇಳಿದರು.
“ವರುಣಾದಲ್ಲಿ ಬಂದು ಗೆದ್ದು ತೋರಿಸಿ”
ಚುನಾವಣೆಯಲ್ಲಿ ಸೋತು ಕುಳಿತಿರುವ ವಿಶ್ವನಾಥ್ ಹಾಗೂ ಪ್ರತಾಪ್ ಸಿಂಹ ಅವರು ಡಾ. ಯತೀಂದ್ರ ಸಿದ್ದರಾಮಯ್ಯರ ಬಗ್ಗೆ ಹಗುರವಾಗಿ ಮಾತನಾಡುವುದು ಸರಿಯಲ್ಲ. ತಾಕತ್ತು ಇದ್ದರೆ ವರುಣಾ ಕ್ಷೇತ್ರದಲ್ಲಿ ಬಂದು ಗೆದ್ದು ತೋರಿಸಲಿ. ಆಧಾರರಹಿತ ಹೇಳಿಕೆಗಳನ್ನು ನೀಡಿದರೆ ಯುವ ಸಮೂಹ ಪ್ರತಿಭಟನೆ ನಡೆಸಬೇಕಾಗುತ್ತದೆ. ನಿಮ್ಮ ಹೇಳಿಕೆಗಳಿಗೆ ನಾವು ಬಗ್ಗುವುದಿಲ್ಲ, ಜಗ್ಗುವುದಿಲ್ಲ ಎಂದು ಡಾ. ಬಿ. ಮರಯ್ಯ ಎಚ್ಚರಿಸಿದರು.
“ಬಿಜೆಪಿಯವರ ಕುತಂತ್ರ ಸ್ಪಷ್ಟ”
ನರಸೀಪುರದಲ್ಲಿ ಕ್ರೀಡಾಂಗಣ ನಿರ್ಮಾಣವಾಗಬಾರದೆಂಬ ಬಿಜೆಪಿಯವರ ಕುತಂತ್ರ ಇದರಲ್ಲಿ ಕಾಣುತ್ತದೆ. ಸಿಲ್ಕ್ ಫ್ಯಾಕ್ಟರಿ ಜಾಗದ ಮತ್ತೊಂದು ಭಾಗದಲ್ಲಿ ಕ್ರೀಡಾಂಗಣ ನಿರ್ಮಾಣಕ್ಕೆ ಕಾಣದ ಕೈಗಳು ಅಡ್ಡಿಪಡಿಸುತ್ತಿರುವುದು ಸ್ಪಷ್ಟವಾಗಿದೆ. ಸರ್ಕಾರ ಮಣಿಯದೆ ಶೀಘ್ರದಲ್ಲೇ ಸುಸಜ್ಜಿತ ಕ್ರೀಡಾಂಗಣ ನಿರ್ಮಾಣ ಕಾರ್ಯ ಆರಂಭಿಸಬೇಕು ಎಂದು ಡಾ. ಮರಯ್ಯ ಒತ್ತಾಯಿಸಿದರು.
ಈ ಸಂದರ್ಭದಲ್ಲಿ ಯಜಮಾನ್ ಚಿಕ್ಕಲಿಂಗಯ್ಯ, ಚಿಕ್ಕನಂಜಯ್ಯ, ಮರಯ್ಯ, ಮಹದೇವ, ಚಿನ್ನಪ್ಪ, ಎಸ್. ಮಾದಯ್ಯ, ಮಂಜು, ಮಹದೇವು, ಕುಮಾರ, ಮೈಸೂರು ಮಹದೇವ, ರಾಜೇಶ್, ಮಂಜು ಅಶೋಕ, ಶಿವು, ಶಂಕ್ರ, ಅಪ್ಪು, ರವಿ, ದೊರೆ, ರಮೇಶ್ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.
ಟಿ.ನರಸೀಪುರದಲ್ಲಿ ಕ್ರೀಡಾಂಗಣ ನಿರ್ಮಾಣ ವಿಚಾರವು ಇದೀಗ ಸಾರ್ವಜನಿಕ ಚರ್ಚೆಯ ಕೇಂದ್ರಬಿಂದುವಾಗಿದೆ. ಒಂದು ಕಡೆ ಪರಿಸರದ ಪ್ರಶ್ನೆ, ಮತ್ತೊಂದೆಡೆ ಯುವಕರ ಭವಿಷ್ಯದ ಆಶಯ. ಸರ್ಕಾರ ಯಾವ ರೀತಿಯಲ್ಲಿ ಸಮತೋಲನ ಸಾಧಿಸಿ ಯೋಜನೆಯನ್ನು ಮುಂದುವರಿಸುತ್ತದೆ ಎಂಬುದನ್ನು ಕಾದು ನೋಡಬೇಕಾಗಿದೆ.
