ಪಿ.ಹೆಚ್‌.ಡಿ ಮಾನ್ಯತೆ ವಿವಾದದ ನಡುವೆ ನೇಮಕಾತಿ: ಉನ್ನತ ಮಟ್ಟದ ತನಿಖೆಗೆ ಒತ್ತಾಯ

ಮೈಸೂರು ವಿವಿಯಲ್ಲಿ ಸಿಂಡಿಕೇಟ್ ಸದಸ್ಯರ ನೇಮಕ ಕುರಿತು ವಿವಾದ

ಮೈಸೂರು: ಮೈಸೂರು ವಿಶ್ವವಿದ್ಯಾನಿಲಯದ ಆಡಳಿತಾತ್ಮಕ ನಿರ್ಧಾರಗಳ ಬಗ್ಗೆ ಮತ್ತೊಂದು ವಿವಾದ ತಲೆದೋರಿದ್ದು, ಸಿಂಡಿಕೇಟ್ ಸದಸ್ಯರ ನೇಮಕಾತಿ ಕುರಿತಾಗಿ ಗಂಭೀರ ಆರೋಪಗಳು ಕೇಳಿಬಂದಿವೆ. ನಕಲಿ ಪಿ.ಹೆಚ್‌.ಡಿ ಪದವಿ ಹೊಂದಿರುವುದಾಗಿ ಆರೋಪಿಸಲಾಗಿರುವ ವ್ಯಕ್ತಿಗೆ ಸದಸ್ಯತ್ವ ನೀಡಿರುವುದು ಹಾಗೂ ಸೇವಾ ಹಿರಿತನ ನಿಯಮಗಳನ್ನು ಮೀರಿ ಮತ್ತೊಬ್ಬರನ್ನು ನೇಮಕ ಮಾಡಿರುವುದರಿಂದ ವಿಶ್ವವಿದ್ಯಾನಿಲಯದ ಘನತೆಗೆ ಧಕ್ಕೆ ಉಂಟಾಗಿದೆ ಎಂದು ಕೆಲವು ವಲಯಗಳು ಆಕ್ಷೇಪ ವ್ಯಕ್ತಪಡಿಸಿವೆ.

ಲಭ್ಯವಾಗಿರುವ ದಾಖಲೆಗಳ ಆಧಾರದ ಮೇಲೆ ಆಂತೋಣಿ ಪೌಲ್ ರಾಜ್ ವಿರುದ್ಧ ಹಲವು ಪ್ರಶ್ನೆಗಳು ಎದ್ದಿವೆ. ವಿಶ್ವವಿದ್ಯಾನಿಲಯದ ಎಸ್ಟಾಬ್ಲಿಷ್‌ಮೆಂಟ್ ಸಮಿತಿ ತಯಾರಿಸಿದ ಗ್ರೇಡೇಷನ್ ಪಟ್ಟಿಯಲ್ಲಿ ಅವರು 2000ನೇ ಸಾಲಿನಿಂದಲೇ ಬಿ.ಎಡ್ ಕಾಲೇಜಿನಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ ಎಂದು ನಮೂದಿಸಿರುವುದಾಗಿ ತಿಳಿದುಬಂದಿದೆ. ಆದರೆ ಎನ್‌ಸಿಟಿಇ ನಿಯಮಾವಳಿಗಳ ಪ್ರಕಾರ ಬಿ.ಎಡ್ ಕಾಲೇಜುಗಳಲ್ಲಿ ಉಪನ್ಯಾಸಕರಾಗಿ ಸೇವೆ ಸಲ್ಲಿಸಲು ಅಗತ್ಯವಾದ ವಿದ್ಯಾರ್ಹತೆಗಳಾದ ಎಂ.ಎ ಪದವಿಯನ್ನು ಅವರು 2001ರಲ್ಲಿ ಹಾಗೂ ಎಂ.ಎಡ್ ಪದವಿಯನ್ನು 2004ರಲ್ಲಿ ಪೂರ್ಣಗೊಳಿಸಿರುವುದಾಗಿ ದಾಖಲೆಗಳು ಸೂಚಿಸುತ್ತವೆ. ಇದರಿಂದ ಅರ್ಹ ಪದವಿ ಪಡೆದ ಮೊದಲು ಸೇವಾ ಹಿರಿತನ ಪಟ್ಟಿಯಲ್ಲಿ ಸೇರಿಸಲಾಗಿದ್ದಾರೆಯೇ ಎಂಬ ಪ್ರಶ್ನೆ ಮೂಡಿದೆ.

ಇದೇ ವೇಳೆ ಆಂತೋಣಿ ಪೌಲ್ ರಾಜ್ ಅವರು ಸಲ್ಲಿಸಿದ ಸೇವಾ ದಾಖಲೆ ವಿವರಗಳ ಪ್ರಕಾರ 2005ರಿಂದ 2018ರವರೆಗೆ ಸೆಂಟ್ ಜೋಸೆಫ್ ಬಿ.ಎಡ್ ಕಾಲೇಜಿನಲ್ಲಿ ಸೇವೆ ಸಲ್ಲಿಸಿದ್ದಾಗಿ ಉಲ್ಲೇಖಿಸಲಾಗಿದೆ. ಈ ನಡುವೆಯೇ ಅವರು ಪಡೆದಿರುವ ಪಿ.ಹೆಚ್‌.ಡಿ ಪದವಿಯ ಕುರಿತೂ ಅನುಮಾನಗಳು ವ್ಯಕ್ತವಾಗಿವೆ. ಅವರು ಮೆಘಾಲಯದ ಸಿ.ಎಂ.ಜೆ ವಿಶ್ವವಿದ್ಯಾನಿಲಯದಿಂದ ಪಿ.ಹೆಚ್‌.ಡಿ ಪಡೆದಿರುವುದಾಗಿ ತಿಳಿದುಬಂದಿದ್ದು, ಕೋರ್ಸ್ ವರ್ಕ್ ಅಂಕಪಟ್ಟಿಯಲ್ಲಿ ಮುದ್ರಣ ದೋಷಗಳು ಕಂಡುಬಂದಿರುವುದು ಹಾಗೂ ಪ್ರಾವಿಜನಲ್ ಪ್ರಮಾಣಪತ್ರ ಕೈಬರಹದಲ್ಲಿ ಇರುವುದರಿಂದ ದಾಖಲೆಗಳ ವಿಶ್ವಾಸಾರ್ಹತೆ ಕುರಿತು ಪ್ರಶ್ನೆಗಳು ಎದ್ದಿವೆ. ಜೊತೆಗೆ ಪಿ.ಹೆಚ್‌.ಡಿ ದಾಖಲೆಗಳಲ್ಲಿ ಉಲ್ಲೇಖಿತ ಹೆಸರು ಮತ್ತು ಹಿಂದಿನ ಅಂಕಪಟ್ಟಿಗಳಲ್ಲಿನ ಹೆಸರಿನ ವ್ಯತ್ಯಾಸವೂ ಗಮನ ಸೆಳೆದಿದೆ.

ಮೆಘಾಲಯ ಹೈಕೋರ್ಟ್ ನೀಡಿದ ಆದೇಶದ ಪ್ರಕಾರ 2010ರಿಂದ 2013ರ ಅವಧಿಯಲ್ಲಿ ಸಿ.ಎಂ.ಜೆ ವಿಶ್ವವಿದ್ಯಾನಿಲಯ ನೀಡಿದ ಪಿ.ಹೆಚ್‌.ಡಿ ಪದವಿಗಳು ಯುಜಿಸಿ ನಿಯಮಾವಳಿ 2009ಕ್ಕೆ ವಿರುದ್ಧವಾಗಿವೆ ಎಂದು ಹೇಳಲಾಗಿದ್ದು, ಈ ಆದೇಶವನ್ನು ಸುಪ್ರೀಂ ಕೋರ್ಟ್‌ನ ನಾಗರಿಕ ಮೇಲ್ಮನವಿ ಪ್ರಕರಣ ಸಂಖ್ಯೆ 9694/2024ರಲ್ಲಿ ಎತ್ತಿಹಿಡಿಯಲಾಗಿದೆ ಎಂದು ಆರೋಪಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ಆ ಅವಧಿಯಲ್ಲಿ ಪಡೆದಿರುವ ಪಿ.ಹೆಚ್‌.ಡಿ ಪದವಿಗಳ ಮಾನ್ಯತೆ ಪ್ರಶ್ನಾರ್ಥಕವಾಗಿದೆ ಎಂದು ಆಕ್ಷೇಪಿಸಲಾಗಿದೆ.

ಇಂತಹ ವಿವಾದಗಳ ನಡುವೆಯೇ 2024ರಿಂದ 2025ರ ಅವಧಿಗೆ ಆಂತೋಣಿ ಪೌಲ್ ರಾಜ್ ಅವರನ್ನು ಸಿಂಡಿಕೇಟ್ ಸದಸ್ಯರಾಗಿ ನೇಮಕ ಮಾಡಿರುವುದನ್ನು ಪ್ರಶ್ನಿಸಿ ಆಡಳಿತದ ವಿರುದ್ಧ ಟೀಕೆ ವ್ಯಕ್ತವಾಗಿದೆ. ಈ ನೇಮಕಾತಿಯು ವಿಶ್ವವಿದ್ಯಾನಿಲಯದ ಮೌಲ್ಯಗಳಿಗೆ ಧಕ್ಕೆ ತಂದಿದೆ ಎಂದು ಆರೋಪಿಸಲಾಗಿದೆ.

ಇದರ ಜೊತೆಗೆ ಡಾ. ಹೆಚ್.ಎಂ ಮಹೇಶ್ ಅವರ ನೇಮಕಾತಿ ಕುರಿತೂ ವಿವಾದ ವ್ಯಕ್ತವಾಗಿದೆ. ವಿಶ್ವವಿದ್ಯಾನಿಲಯವು ಅವರನ್ನು 15-04-2025ರಂದು ಪ್ರಾಂಶುಪಾಲರಾಗಿ ಅನುಮೋದಿಸಿದರೂ, ಅದಕ್ಕಿಂತ 18 ದಿನಗಳ ಮೊದಲು 27-03-2025ರಿಂದ ಜಾರಿಗೆ ಬರುವಂತೆ ಸಿಂಡಿಕೇಟ್ ಸದಸ್ಯರನ್ನಾಗಿ ನೇಮಕ ಮಾಡಲಾಗಿದೆ ಎಂದು ತಿಳಿದುಬಂದಿದೆ. ರಾಜ್ಯ ವಿಶ್ವವಿದ್ಯಾನಿಲಯಗಳ ಕಾಯ್ದೆ 2000ರ ಕಲಂ 28(1)(ಎಫ್) ಪ್ರಕಾರ ಸೇವಾ ಹಿರಿತನ ಪರಿಗಣನೆ ಅಗತ್ಯವಿರುವ ಸಂದರ್ಭದಲ್ಲಿ ಅದನ್ನು ಕಡೆಗಣಿಸಿ ನೇಮಕಾತಿ ಮಾಡಲಾಗಿದೆ ಎಂಬ ಆರೋಪ ಕೇಳಿಬಂದಿದೆ. ಪ್ರಸ್ತುತವೂ ಅವರು ಸಿಂಡಿಕೇಟ್ ಸದಸ್ಯರಾಗಿ ಮುಂದುವರಿದಿರುವುದು ಚರ್ಚೆಗೆ ಕಾರಣವಾಗಿದೆ.

ಈ ಎಲ್ಲಾ ವಿಚಾರಗಳನ್ನು ಗಮನದಲ್ಲಿಟ್ಟುಕೊಂಡು ರಾಜ್ಯಪಾಲರು ಉನ್ನತ ಮಟ್ಟದ ತನಿಖೆ ನಡೆಸಿ ಸತ್ಯಾಸತ್ಯತೆ ಪತ್ತೆಹಚ್ಚಬೇಕು ಎಂದು ಆಗ್ರಹಿಸಲಾಗಿದೆ. ಆಂತೋಣಿ ಪೌಲ್ ರಾಜ್ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು, ಡಾ. ಹೆಚ್.ಎಂ ಮಹೇಶ್ ಅವರನ್ನು ಸಿಂಡಿಕೇಟ್ ಸದಸ್ಯತ್ವದಿಂದ ದೂರಗೊಳಿಸಬೇಕು ಹಾಗೂ ಸದಸ್ಯತ್ವ ಅವಧಿಯಲ್ಲಿ ಪಡೆದ ಭತ್ಯೆಗಳನ್ನು ವಾಪಸು ಪಡೆಯಬೇಕು ಎಂದು ಒತ್ತಾಯಿಸಲಾಗಿದೆ.

ಅದರ ಜೊತೆಗೆ ನೇಮಕಾತಿ ಪ್ರಕ್ರಿಯೆಯಲ್ಲಿ ಭಾಗಿಯಾಗಿದ್ದ ವಿಶ್ವವಿದ್ಯಾನಿಲಯದ ಕುಲಪತಿಗಳು, ಕುಲಸಚಿವರು ಹಾಗೂ ಸಂಬಂಧಪಟ್ಟ ಸಿಬ್ಬಂದಿಯ ಪಾತ್ರದ ಕುರಿತು ಪರಿಶೀಲನೆ ನಡೆಸಬೇಕು ಎಂಬ ಬೇಡಿಕೆ ಕೂಡ ವ್ಯಕ್ತವಾಗಿದೆ. ವಿಶೇಷವಾಗಿ ಸಿಂಡಿಕೇಟ್ ಸದಸ್ಯರ ವಿದ್ಯಾರ್ಹತೆಗಳ ಜಿನಿಯಾನಿಟಿ ಪ್ರಮಾಣಪತ್ರಗಳನ್ನು ಪರಿಶೀಲಿಸದೆ ನೇಮಕಾತಿ ಮಾಡಿರುವುದಾದರೆ ಅದರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಲಾಗಿದೆ.

ಈ ಕುರಿತು ವಿಶ್ವವಿದ್ಯಾನಿಲಯದ ಅಧಿಕಾರಿಗಳಿಂದ ಅಧಿಕೃತ ಪ್ರತಿಕ್ರಿಯೆ ಲಭ್ಯವಾಗಿಲ್ಲ. ಆದರೆ ಈ ಆರೋಪಗಳು ಶಿಕ್ಷಣ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದ್ದು, ತನಿಖೆಯ ನಂತರವೇ ವಾಸ್ತವ ಸ್ಥಿತಿ ಬಹಿರಂಗವಾಗಲಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗುತ್ತಿದೆ.

ವಂದನೆಗಳೊಂದಿಗೆ

ಅರವಿಂದ್ ಶರ್ಮ

ಸಾಮಾಜಿಕ ಚಳವಳಿಗಾರರು, ಮೈಸೂರು