ಚಿನ್ನದ ಬೆಲೆ ಜಿಗಿತ ಇಳಿಕೆ ಆಟ: ಬೆಂಗಳೂರಿನಲ್ಲಿ ಗೋಲ್ಡ್ ಕಾಯಿನ್ ಖರೀದಿಗೆ ಜನರ ದಂಡೇ!
ಬೆಂಗಳೂರು, ಮಾರ್ಚ್ 27:- ಚಿನ್ನದ ಬೆಲೆಗಳು ಒಂದೇ ದಿನದಲ್ಲಿ ಏರಿಳಿತದ ರೋಲರ್ಕೋಸ್ಟರ್ ಸವಾರಿ ಮಾಡುತ್ತಿರುವಾಗ, ಬೆಂಗಳೂರಿನ ಬಂಗಾರದ ಮಾರುಕಟ್ಟೆಯಲ್ಲಿ ಹೊಸ ಟ್ರೆಂಡ್ ಹೊಳೆದು ಬಂದಿದೆ . ಆಭರಣಗಳಿಗಿಂತಲೂ ಗೋಲ್ಡ್ ಕಾಯಿನ್ಗಳಿಗೆ ಭಾರೀ ಬೇಡಿಕೆ ಏರಿಕೆಯಾಗಿದ್ದು, ಗ್ರಾಹಕರು “ಇಂದು ಕಡಿಮೆ, ನಾಳೆ ಹೆಚ್ಚು” ಎಂಬ ಲೆಕ್ಕಾಚಾರದಲ್ಲಿ ಹೂಡಿಕೆಗಾಗಿ ನಾಣ್ಯಗಳತ್ತ ಮುಖ ಮಾಡಿದ್ದಾರೆ.
ಕಾಯಿನ್ ಕ್ರೇಜ್: ಸಣ್ಣ ತೂಕ, ದೊಡ್ಡ ಬೇಡಿಕೆ
ನಗರದ ಪ್ರಮುಖ ಜುವೆಲ್ಲರಿ ಅಂಗಡಿಗಳಲ್ಲಿ 2 ಗ್ರಾಂ, 4 ಗ್ರಾಂ, 6 ಗ್ರಾಂ ಮತ್ತು 8 ಗ್ರಾಂ ಗೋಲ್ಡ್ ಕಾಯಿನ್ಗಳು ಹಾಟ್ಕೇಕ್ಗಳಂತೆ ಮಾರಾಟವಾಗುತ್ತಿವೆ. ಬೆಳಿಗ್ಗೆ ಅಂಗಡಿಗಳಿಗೆ ತಲುಪುವ ಕಾಯಿನ್ಗಳು ಮಧ್ಯಾಹ್ನದೊಳಗೆಲೇ ಸ್ಟಾಕ್ ಔಟ್ ಆಗುತ್ತಿರುವುದು ವ್ಯಾಪಾರಿಗಳ ಮಾತು. ವಿಶೇಷವಾಗಿ 2 ಮತ್ತು 4 ಗ್ರಾಂ ಕಾಯಿನ್ಗಳಿಗೆ ಮಧ್ಯಮ ವರ್ಗದ ಗ್ರಾಹಕರಿಂದ ಹೆಚ್ಚಿನ ಪ್ರತಿಕ್ರಿಯೆ ಸಿಗುತ್ತಿದೆ.
ಹೂಡಿಕೆ ಮನೋಭಾವ ಹೆಚ್ಚಳ
ಚಿನ್ನದ ದರದಲ್ಲಿ ಕಾಣುತ್ತಿರುವ ಅಸ್ಥಿರತೆ ಜನರಲ್ಲಿ ಹೊಸ ಹೂಡಿಕೆ ಮನೋಭಾವವನ್ನು ಹುಟ್ಟಿಸಿದೆ. ಆಭರಣ ಖರೀದಿಸಿದರೆ ಮೇಕಿಂಗ್ ಚಾರ್ಜ್ ಮತ್ತು ವೇಸ್ಟೇಜ್ ಹೆಚ್ಚಾಗುತ್ತದೆ. ಆದರೆ ಗೋಲ್ಡ್ ಕಾಯಿನ್ಗಳಲ್ಲಿ ಆ ಸಮಸ್ಯೆ ಕಡಿಮೆ ಇರುವುದರಿಂದ ಹೂಡಿಕೆದಾರರು ಇದನ್ನು ಹೆಚ್ಚು ಸುರಕ್ಷಿತ ಆಯ್ಕೆ ಎಂದು ಪರಿಗಣಿಸುತ್ತಿದ್ದಾರೆ. “ಇಂದೇ ತೆಗೆದುಕೊಂಡರೆ ನಾಳೆ ಲಾಭ” ಎಂಬ ನಿರೀಕ್ಷೆ ಖರೀದಿಯನ್ನು ಮತ್ತಷ್ಟು ಉತ್ತೇಜಿಸುತ್ತಿದೆ.
ದರದಲ್ಲಿ ಭಾರೀ ಏರುಪೇರು
ಕಳೆದ ಕೆಲ ದಿನಗಳಿಂದ ಚಿನ್ನದ ದರದಲ್ಲಿ ಭಾರೀ ಚಲನವಲನ ಕಂಡುಬಂದಿದೆ. ಒಂದೇ ದಿನದಲ್ಲಿ 10 ಗ್ರಾಂ ಚಿನ್ನದ ಬೆಲೆ 3,450 ರೂಪಾಯಿ ಏರಿಕೆಯಾಗಿ ಗ್ರಾಹಕರನ್ನು ಬೆಚ್ಚಿಬೀಳಿಸಿತ್ತು. ಮಾರ್ಚ್ 23ರಂದು 22 ಕ್ಯಾರಟ್ ಚಿನ್ನದ ಬೆಲೆ ಪ್ರತಿ ಗ್ರಾಂಗೆ ₹12,635 ಇತ್ತು. ನಂತರ ಅದು ₹13,465ರವರೆಗೆ ಏರಿಕೆ ಕಂಡು, ಮತ್ತೆ ಸಂಜೆ ವೇಳೆಗೆ ₹13,250ಕ್ಕೆ ಇಳಿದಿದೆ.
ಮಳಿಗೆಗಳ ಸಂಕಷ್ಟ
ಬೇಡಿಕೆ ಏರಿಕೆಯಿಂದ ಅಂಗಡಿಗಳು ಹೊಸ ಸ್ಟಾಕ್ ತರಲು ಕಷ್ಟಪಡುತ್ತಿವೆ. ಕೆಲವು ಜುವೆಲ್ಲರ್ಸ್ಗಳು ಮುಂಗಡ ಬುಕ್ಕಿಂಗ್ ವ್ಯವಸ್ಥೆ ಆರಂಭಿಸಿದ್ದು, ಗ್ರಾಹಕರು ಕಾಯಿನ್ಗಾಗಿ ಕಾಯುವ ಪರಿಸ್ಥಿತಿ ನಿರ್ಮಾಣವಾಗಿದೆ.
ಚಿನ್ನದ ದರದ ಅಸ್ಥಿರತೆ ನಡುವೆಯೇ “ಸಣ್ಣ ನಾಣ್ಯ, ದೊಡ್ಡ ಹೂಡಿಕೆ” ಎಂಬ ತತ್ವ ಈಗ ಬೆಂಗಳೂರಿನಲ್ಲಿ ಟ್ರೆಂಡ್ ಆಗುತ್ತಿದೆ.
