ಮೈಸೂರು: ದೇಶದ ಪೊಲೀಸ್ ಮತ್ತು ಅರೆಸೇನಾ ಪಡೆಗಳ ಸೇವೆ, ತ್ಯಾಗ ಹಾಗೂ ಧೈರ್ಯವನ್ನು ಗೌರವಿಸುವ ಉದ್ದೇಶದಿಂದ ವಾಸನ್ ಐ ಕೇರ್ ವತಿಯಿಂದ ‘ಪೊಲೀಸ್ ಹೀರೊಸ್’ ಎಂಬ ವಿಶೇಷ ರಾಷ್ಟ್ರಮಟ್ಟದ ಅಭಿಯಾನಕ್ಕೆ ಚಾಲನೆ ನೀಡಲಾಗಿದೆ. ಫೆಬ್ರವರಿ 9ರವರೆಗೆ ಭಾರತದಾದ್ಯಂತ ಇರುವ ವಾಸನ್ ಐ ಕೇರ್ನ ಎಲ್ಲಾ ಆಸ್ಪತ್ರೆಗಳು ಮತ್ತು ಚಿಕಿತ್ಸಾಲಯಗಳಲ್ಲಿ ಈ ಯೋಜನೆ ಜಾರಿಯಲ್ಲಿರುತ್ತದೆ.
ಮುಂಚೂಣಿಯಲ್ಲಿ ದೇಶದ ಭದ್ರತೆಗಾಗಿ ಕಾರ್ಯನಿರ್ವಹಿಸುವ ಸಿಬ್ಬಂದಿಯ ದೃಷ್ಟಿ ಆರೋಗ್ಯವನ್ನು ಕಾಪಾಡುವ ಗುರಿಯೊಂದಿಗೆ, ಈ ಅಭಿಯಾನದಡಿ ಉಚಿತ ಸಮಗ್ರ ಕಣ್ಣಿನ ತಪಾಸಣೆ, ಕನ್ನಡಕಗಳ ಖರೀದಿ ಹಾಗೂ ರೋಗನಿರ್ಣಯ ಪರೀಕ್ಷೆಗಳಲ್ಲಿ ಆಕರ್ಷಕ ರಿಯಾಯಿತಿಗಳು ಲಭ್ಯವಿವೆ. ಎಸ್ಎಸ್ಬಿ, ಸಿಆರ್ಪಿಎಫ್, ಸಿಐಎಸ್ಎಫ್, ಬಿಎಸ್ಎಫ್, ಡಬ್ಲ್ಯೂಬಿಎಚ್ಎಸ್, ಸಿಎಪಿಎಫ್ ಮತ್ತು ರಾಜ್ಯ ಪೊಲೀಸ್ ಇಲಾಖೆಗಳ ಸಿಬ್ಬಂದಿಗಳು ಮಾನ್ಯ ಸೇವಾ ಗುರುತಿನ ಚೀಟಿಯನ್ನು ತೋರಿಸಿ ನೇರವಾಗಿ ಈ ಸೌಲಭ್ಯಗಳನ್ನು ಪಡೆಯಬಹುದು.
ಕಾರ್ಯಕ್ರಮದ ಉದ್ಘಾಟನೆಯ ಬಳಿಕ ಮಾತನಾಡಿದ ಸಿಸಿಬಿಯ ನಿವೃತ್ತ ಸಬ್ ಇನ್ಸ್ಪೆಕ್ಟರ್ ಶಾಂತರಾಜು, ಪೊಲೀಸ್ ಸೇವೆ ಕೇವಲ ವೃತ್ತಿಯಲ್ಲ, ಅದು ಮಹತ್ತರವಾದ ಸಾಮಾಜಿಕ ಜವಾಬ್ದಾರಿಯಾಗಿದೆ ಎಂದರು. ನಿದ್ರಾಹೀನತೆ, ಕಠಿಣ ಹವಾಮಾನ ಮತ್ತು ಕುಟುಂಬದಿಂದ ದೂರವಿರುವುದು ಸೇರಿದಂತೆ ಪೊಲೀಸರ ತ್ಯಾಗಗಳನ್ನು ಅವರು ಸ್ಮರಿಸಿ, ಪರಿಣಾಮಕಾರಿ ತನಿಖೆ ಮತ್ತು ಕರ್ತವ್ಯ ನಿರ್ವಹಣೆಗೆ ತೀಕ್ಷ್ಣ ದೃಷ್ಟಿ ಅತ್ಯಗತ್ಯ ಎಂದು ಒತ್ತಿಹೇಳಿದರು.
ವಾಸನ್ ಐ ಕೇರ್ನ ಮುಖ್ಯ ವೈದ್ಯಕೀಯ ಅಧಿಕಾರಿ ಹಾಗೂ ಹಿರಿಯ ಕಣ್ಣಿನ ಪೊರೆ ಶಸ್ತ್ರಚಿಕಿತ್ಸಕ ಡಾ. ಹೇಮಾ ಶ್ರೀನಾಥ್ ಮಾತನಾಡಿ, ನಿರಂತರ ಒತ್ತಡದಲ್ಲಿ ಕೆಲಸ ಮಾಡುವ ಪೊಲೀಸ್ ಮತ್ತು ಅರೆಸೇನಾ ಸಿಬ್ಬಂದಿಗೆ ಕೃತಜ್ಞತೆ ಸಲ್ಲಿಸುವ ಸಲುವಾಗಿ ಈ ಅಭಿಯಾನ ಹಮ್ಮಿಕೊಳ್ಳಲಾಗಿದೆ ಎಂದರು. ಅನಿಯಮಿತ ವೇಳಾಪಟ್ಟಿ ಮತ್ತು ದೀರ್ಘಕಾಲದ ಒತ್ತಡದಿಂದ ಉಂಟಾಗುವ ಜೀವನಶೈಲಿ ಕಾಯಿಲೆಗಳು ದೃಷ್ಟಿ ಆರೋಗ್ಯದ ಮೇಲೂ ಪರಿಣಾಮ ಬೀರುತ್ತವೆ ಎಂದು ತಿಳಿಸಿದರು. ಹೀಗಾಗಿ ನಿಯಮಿತ ಆರೋಗ್ಯ ತಪಾಸಣೆ, ಯೋಗ, ಸಮರ್ಪಕ ನೀರಿನ ಸೇವನೆ ಹಾಗೂ ರಕ್ಷಣಾತ್ಮಕ ಕನ್ನಡಕಗಳ ಬಳಕೆಯನ್ನು ಅವರು ಸಲಹೆ ನೀಡಿದರು.
ಕಾರ್ಯಕ್ರಮದಲ್ಲಿ ನಿವೃತ್ತ ಸಬ್ ಇನ್ಸ್ಪೆಕ್ಟರ್ಗಳಾದ ಜಯಣ್ಣ, ಆರ್ಪಿಎಫ್ ಮಂಜುನಾಥ್, ಹಾಗೂ ವೈದ್ಯರಾದ ಡಾ. ಮಹೇಶ್ವರಿ, ಡಾ. ಅರುಣ್ ಕುಮಾರ್ ಮತ್ತು ಡಾ. ಉಮೇಶ್ ಉಪಸ್ಥಿತರಿದ್ದರು.
